Kjörstjórnarmeðlimum fækkar

UPPFÆRT KL. 15:18
Áðan fluttu varðhundarnir fréttir af því að Hildur Ýr hefði verið rekin úr kjörstjórn. Kjörstjórnin hefur nú bent varðhundum á að Hildur Ýr hafi ekki verið rekin heldur hafi hún ákveðið að segja af sér eftir atburði dagsins. 

---- 

Ástæðan er eflaust sú að í dag kom hlutdrægni Hildar Ýrar bersýnilega í ljós, en reglan er að kjörstjórnarmeðlimir gæti fyllsta hlutleysis í kosningunum. Hildur tók skýlausa afstöðu í kappræðum dagsins gegn Arnóri Gunnari en Hildur Ýr er, eins og alþjóð veit, ástkona Kjartans Orra. 

Hildur Ýr og fleiri vógu að Arnóri fyrir að hafa tekið þátt í Herranótt á meðan hann sat í Framtíðarstjórn. Benda má á að slíkt hið sama gerðu bæði Kristín Ólafsdóttir og Adolf Smári án þess að Kári forseti gripi í taumana.  Kjartan er eini meðstjórnandi Framtíðarinnar sem hafnaði hlutverki í Herranótt. Ýmsum sögum hefur farið af ástæðum þess, en Kjartan sagði það vera „algjört prinsippmál“ að menn einblíndu á stjórnarstörfin á meðan þeir gegndu þeim.

Arnór virtist óviðbúinn umræðum um Herranæturþátttöku sína og varð greinilega bylt við þegar þessi mál báru á góma. Meðal annars sagði hann að þátttaka stjórnarmeðlima hefði ekki haft nein áhrif á störf Framtíðarinnar eftir jól. Varðhundarnir leyfa sér að efast um að það sé rétt.

Kappræðurnar í hádeginu urðu blóðugri en margir bjuggust við. Varðhundarnir fagna því. Jafnframt mega nemendur skólans hrósa happi yfir því að kjörstjórnin er hlutlausari í dag en hún var í gær.

- JPJ

UPPFÆRT KL. 17:18
Varðhundunum barst bréf frá Nóra með rauða nefið rétt í þessu og hér verður það birt í heild sinni. Vilji Kjartan koma einhverju á framfæri munu varðhundarnir ekki hika við að birta skilaboð frá honum.

Halló. Mig langar til að benda á að ég er mjög ósáttur við það hvernig mynd er máluð af þessu Herranæturmáli öllu saman. Jújú, ég neita því ekki að mér tókst ekki að svara spurningunum í dag nægilega vel og sýni því þess vegna skilning að þið hafið fjallað um þetta í færslunni áðan eins og gert var. 

Ég áttaði mig hins vegar á því um leið og ég steig niður af sviðinu að ég hefði átt að leggja meiri áherslu á það að ég fórnaði náminu. Eftir að ég gerðist óreglulegur núna eftir áramót hef ég sótt 9 tíma á viku til þess að geta ráðið betur við þessa blöndu. Ég stend við það sem ég sagði í dag: Herranótt kom ekki á neinn hátt niður á starfi mínu í Framtíðarstjórn. Það eina sem Herranótt kom mögulega niður á er námið og varð þetta til þess að ég þarf að læra mjög mikið í apríl. 

Á álagstíma Herranætur gerði ég a.m.k. (ath: a.m.k.!) jafnmikið og þeir Framtíðarstjórnarmeðlimir sem ekki tóku þátt í Herranótt. Mér tókst að útfæra þetta mjög vel og notaði daginn (þegar margir aðrir voru í skólanum) mikið fyrir störf Framtíðarinnar. Ég eyddi ótrúlega miklum tíma í Framtíðina á sama tíma og Herranótt var í gangi og finnst þess vegna ósanngjarnt að mótframbjóðandi minn komi eitthvað betur út úr þessu máli en ég. 

Framtíðin hefur alltaf verið í fyrsta sæti hjá mér og einmitt þess var það erfið ákvörðun að taka þátt í Herranótt - ég þurfti mikið að velta því fyrir mér hvort það gengi upp að taka þátt í Herranótt ef ég vildi halda Framtíðinni í fyrsta sæti. Þess vegna ráðfærði ég mig við fólk sem hafði tekið þátt í Herranótt og verið í stjórn á sama tíma (t.a.m. Guðmund Felixson og Einar Lövdahl) og komst að þeirri niðurstöðu að það hlyti að ganga upp að hafa Framtíðina í fyrsta sæti og taka samt þátt í Herranótt - sem var hárrétt. Það kom ekki á neinn hátt niður á starfi mínu í Framtíðarstjórn - það eina sem mætti afgangi var námið (sem ég mun nota apríl í að vinna upp). 

Ég ítreka að það að taka þátt í Herranótt var ein erfiðasta ákvörðun sem ég hef tekið. En þegar á hólminn var komið kom í ljós að hún var ein sú réttasta. Enginn getur neitað því - ekki einu sinni Kjartan. 

Kv. Arnór Gunnar